Á að banna reykingar alfarið?

Ég hef verið að velta því fyrir mér hvernig reykingabannið á veitingastöðum hefur bitnað á landsmönnum.

Það hlýtur að vera hræðilegt fyrir nikótínfíkla að þurfa að fara út í kuldann í hvert einasta skipti sem þörfin tekur yfir. Hver er nautnin, þegar menn þurfa að sjúga þetta í sig skjálfandi og frjósandi?

Þar sem ég bý hefur samskonar bann verið í gildi í meir en eitt ár og kvarta fáir yfir því. Veitingastaðir hér hita upp veröndina fyrir utan staðinn svo að fólk frjósi ekki.

Bannið hefur valdið því að andrúmsloftið innanhúss hefur breyst til muna. Í staðinn fyrir yfirþyrmandi reykingalykt er loftið þrungið allskonar ilmvötnum, dýrum og ódýrum sem blandast lyktinni af þeim sem ekki hafa náð því að þvo sér í langan tíma. Svitalykt blandast við svitalyktareyðandi lykt. Allskonar matur veldur því að lykt sem kemur frá neðri deild líkamans verður áberandi. Þetta blandast allt í illa lyktandi daun sem léleg loftræsting getur ekki bætt fyrr en löngu eftir að allir eru farnir heim. Og ekki bætir úr því að hitinn inni, magnar þetta allt upp.

Þar að auki er komið upp nýtt vandamál. Þeir sem búa nálægt veitingastöðum geta ekki lengur opnað glugga vegna þess að allir þeir sem þurfa að reykja, standa fyrir utan og blása út reyknum með tilheyrandi fýlu sem áður var innilokuð og yfirgnæfði aðra fýlu sem nú eru að eyðileggja andrúmsloftið inni á þessum stöðum.

Hvað á gera? Einu sinni, ekki alls fyrir löngu var áfengi bannað. Ég ætla ekki að fara inn á það hvers vegna en hins vegar ætla ég að vekja máls á því hvers vegna reykingar eru ekki bannaðar alfarið. Til stuðnings þessu máli má geta þess að reykingar er stór kostnaður í heilbrigðiskerfi vestrænna þjóða. Krabbamein, lungnaþemba og fleiri sjúkdómar kostar skattgreiðendur mikla peninga, peninga sem betur er varið í annað.

Hvað myndi gerast ef að Ísland fyrst þjóða myndi banna reykingar alveg. Þar med innflutning á tóbaki og öðrum vörum með nikótíni í. Ísland yrði fyrsta þjóðin sem yrði laus við eitt af dýrustu heilsuvandamálum sem vestrænar þjóðir hafa glimt við. Landsmenn yrðu einnig ríkari. Reiknið út hvað einn pakki á dag kostar í 10 ár, eða 20 ár, eða 30 ár.

 

Athugasemdir

[Ásgeir Kristinn Lárusson, 4.9.2007 kl. 08:28]

Tek undir þessa hugmynd - sjálfur reyki ég og hef verið „háður þessum andskota“ í 30 ár. Kaldhæðnin í þessu öllu er auðvitað sú, að Ríkið sjálft er að eitra fyrir þegnum sínum. Samkvæmt rannsóknum, þá er þriðjungur reykingamanna „nikótínistar“, hinir eru meira svona sosial smókerar og eiga tiltölulega auðvelt með að hætta. Líst vel á að gera slíka samfélagslega tilraun og ríkisvaldið noti í hana eitthvað af þeim milljörðum,sem það hefur í tekjur árlega af eitruninni. Spáum líka í kolefnisjöfnunina!

[Haukur Nikulásson, 4.9.2007 kl. 08:38]

Sem óvirkur nikótínfíkill er ég fylgjandi algjöru banni. Það stríðir þó herfilega á móti því að ég er líka á móti forsjárhyggju.

Þessi fíkn er alveg tilgangslaus og ég er eiginlega viss um að henn verður fljótlega eytt með lítilsháttar heilaaðgerð í framtíðinni.